Safar yoki sayohat uchun aptechka: kerakli narsalarni yig‘amiz

Birinchi yordam
Kesilish yoki kuyish holatlarida kerak bo‘ladigan oddiy vositalar:

• bint;

• leykoplastirlar (turli o‘lcham va uzunlikdagilar bo‘lgani ma’qul);

• elastik bint;

• yod va «zelyonka» (brilliant yashil eritmasi);

• vodorod peroksidi yoki xlorheksidin.

Oshqozon muammolari va allergiya uchun dorilar
O‘zingiz bilan olib ketish tavsiya etiladigan muhim preparatlar:

• antigistamin preparatlar («Lordes», «Zodak» va sizga mos boshqa tabletkalar);

• probiotiklar (masalan, «Linex»);

• ich ketishiga qarshi («Loperamid» yoki boshqa mos vositalar);

• zaharlanish va qorin dam bo‘lishiga qarshi (faollashtirilgan ko‘mir, «Smekta», «Mezim»).

Hasharotlarga qarshi sprey va gellar
Ehtiyot chorasi sifatida hasharotlar va chivin chaqishiga qarshi gel yoki krem olib oling. Ayniqsa, hasharotlar ko‘p bo‘ladigan mamlakatlarga uchayotgan bo‘lsangiz, qo‘shimcha ehtiyot choralarini ko‘rgan ma’qul.

Quyoshda toblanish va undan keyin
Quyoshda toblanishni yaxshi ko‘radiganlar – quyoshdan himoyalovchi kremni unutmang. Qo‘shimcha ravishda, tarkibida pantenol bo‘lgan quyoshda toblangandan keyingi moy yoki sprey ham oling. Bunday mahsulotlar uzoq vaqt quyosh ostida bo‘lgandan keyin terini himoya qiladi va unga g‘amxo‘rlik qiladi (ayniqsa teringiz «kuyib» qolgan bo‘lsa).
Ultrabinafsha nurlaridan terini himoya qilish va fotoqarishni oldini olish uchun SPF 50+ PA++++ dan foydalanishni qat’iy tavsiya qilamiz. Uni har 2–3 soatda qayta surtish kerak.

Isitma ko‘tarilganda
Ba’zan ta’til vaqtida immunitet zaiflashib, shamollash paydo bo‘lishi mumkin. U bilan birga tana harorati ham ko‘tariladi. Bu iqlimga moslashish davrida ham yuz berishi mumkin. Bunday holatlar uchun o‘zingiz bilan termometr, yaxshisi raqamli termometr olib olgan ma’qul.
Haroratni tushirish uchun isitma tushiruvchi dorilar, masalan, ibuprofen, paratsetamol, Nurofen mos keladi.
Agar bolalar bilan sayohat qilishni rejalashtirayotgan bo‘lsangiz, bolalar yoshiga mos keladigan dorilarni oling.

Retsept bo‘yicha beriladigan preparatlar
Ehtiyot chorasi sifatida shifokor tomonidan tegishli tartibda rasmiylashtirilgan retseptni o‘zingiz bilan olib oling. Dori vositalarining nomlari lotin harflarida yozilgan bo‘lsa, yanada yaxshi. Ayrim mamlakatlarda retsept bo‘yicha beriladigan dorilarni olib kirish bo‘yicha muayyan talablar mavjud. Bu masalani oldindan o‘ylab qo‘ying.

Boshqa maslahatlar
Tashrif buyurayotgan mamlakatingizga qarab, zarur emlashlarni olish uchun bir necha oy oldin shifokorga murojaat qiling. Albatta, vaksina olganingizni tasdiqlovchi hujjatni o‘zingiz bilan olib yuring.
Qo‘shimcha ravishda, aptechkaga nashatir spirti (hushdan ketish holatlarida), antiseptik vositalar, nam va quruq salfetkalarni soling. Tibbiy qo‘lqoplarni ham qo‘shishingiz mumkin – 1–2 juft.
Ayollarga ehtiyot chorasi sifatida gigiyena vositalarini olishni tavsiya qilamiz.

Xulosa
Ta’tilga otlanayotganda sog‘lig‘ingizni unutmang. Hatto bolalar bilan sayohat qilayotgan bo‘lsangiz ham, o‘zingiz bilan qanday dori vositalarini olib ketishingizni yaxshilab o‘ylab chiqing. Tanlagan preparatlaringiz boradigan mamlakatga olib kirishga ruxsat etilgan-etilmaganini oldindan tekshiring. Agar ular taqiqlangan bo‘lsa, muqobil preparatlarga e’tibor qarating. Ehtiyot choralarini ko‘rish ortiqcha emas. Zarurat tug‘ilsa, dorilarni o‘sha joyning o‘zidan xarid qilishingiz mumkin. Bu holatda ham ushbu dorilar retsept bo‘yicha beriladigan preparatlar ro‘yxatiga kiradimi yoki yo‘qmi, oldindan tekshirish zarur.